غزوہ حنین میں شرکت کرنے والوں کے بارے میں اللہ تعالیٰ کا ارشاد ہے۔ ثُمَّ اَنۡزَلَ اللّٰہُ سَکِیۡنَتَہٗ عَلٰی رَسُوۡلِہٖ وَ عَلَی الۡمُؤۡمِنِیۡنَ وَ اَنۡزَلَ جُنُوۡدًا لَّمۡ تَرَوۡہَا وَ عَذَّبَ الَّذِیۡنَ کَفَرُوۡا ؕ وَ ذٰلِکَ جَزَآءُ الۡکٰفِرِیۡنَ ۔ توبہ آیت:26. پھر اللہ نے اپنی طرف سے تسکین اپنے نبی پر اور مومنوں پر اتاری اور اپنے وہ لشکر بھیجے جنہیں تم دیکھ نہیں رہے تھے اور کافروں کو پوری سزا دی ۔ ان کفار کا یہی بدلہ تھا ۔ مذکورہ آیت کے اندر جنگ حنین میں شرکت کرنے والے تمام صحابہ کرام رضوان اللہ علیہم اجمعین کے لیے اللہ کی طرف سے سکون نازل ہونے کا ذکر ہے نیز انکو مؤمن کہا گیا ہے اور حضرت معاویہ رضی اللہ عنہ اس جنگ میں شامل تھے کیونکہ فتح مکہ کے وقت مسلمان ہوئے تھے اور جنگ حنین بعد میں ہوئی۔ ابن تيمية رحمه الله فرماتے ہیں : معاویہ رضی اللہ عنہ اور ان کے بھائی یزید اور سہیل بن عمرو اور حارث بن ھشام وغیرہ جو فتح مکہ کے ٹائم پر مسلمان ہوئے تھے انہوں نے نبی علیہ الصلاۃ والسلام کے ساتھ حنین کی جنگ میں شرکت کی تھی۔ تو اس آیت( ثم انزل الله سكينته على و رسوله وعلى المؤمنين.....) کے عموم کے اندر داخل ہیں اور وہ مؤمنین میں سے تھے جن پر اللہ تعالی نے اپنے نبی صلی اللہ علیہ وسلم کے ساتھ سکینت( راحت) نازل کی۔ مجموع الفتاوى، لابن تيمية: [4/458]۔

نبی صلی اللہ علیہ وسلم کی ذات مقدسہ پر ایمان لاکر جہاد کرنے والوں کے لئے فضیلت: لٰکِنِ الرَّسُوۡلُ وَ الَّذِیۡنَ اٰمَنُوۡا مَعَہٗ جٰہَدُوۡا بِاَمۡوَالِہِمۡ وَ اَنۡفُسِہِمۡ ؕ وَ اُولٰٓئِکَ لَہُمُ الۡخَیۡرٰتُ ۫ وَ اُولٰٓئِکَ ہُمُ الۡمُفۡلِحُوۡنَ ﴿۸۸﴾ اعَدَّ اللّٰہُ لَہُمۡ جَنّٰتٍ تَجۡرِیۡ مِنۡ تحتھا الۡاَنۡہٰرُ خٰلِدِیۡنَ فِیۡہَا ؕ ذٰلِکَ الۡفَوۡزُ الۡعَظِیۡمُ ﴿٪۸۹﴾ لیکن خود رسول اللہ ( صلی اللہ علیہ وسلم ) اور اس کے ساتھ ایمان والے، اپنے مالوں اور جانوں سے جہاد کرتے ہیں ، یہی لوگ بھلائیوں والے ہیں اور یہی لوگ کامیابی حاصل کرنے والے ہیں ۔ انہی کے لئے اللہ نے وہ جنتیں تیار کی ہیں جن کے نیچے نہریں جاری ہیں جن میں یہ ہمیشہ رہنے والے ہیں ۔ یہی بہت بڑی کامیابی ہے۔ وضاحت: اس آیت کے عموم سے معلوم ہوا کہ جن بھی افراد نے اسلام قبول کرکے آپ علیہ السلام کے ساتھ مل کر کفار سے جہاد کیا ،وہی لوگ بھلائی والے ہیں اور ان کے لیے جنت کے باغات ہیں اور معاویہ رضی اللہ عنہ اس لسٹ میں داخل ہیں۔

غزوہ تبوک میں شرکت کرنے والوں کے لیے فضیلت: لَقَدۡ تَّابَ اللّٰہُ عَلَی النَّبِیِّ وَ الۡمُہٰجِرِیۡنَ وَ الۡاَنۡصَارِ الَّذِیۡنَ اتَّبَعُوۡہُ فِیۡ سَاعَۃِ الۡعُسۡرَۃِ مِنۡۢ بَعۡدِ مَا کَادَ یَزِیۡغُ قُلُوۡبُ فَرِیۡقٍ مِّنۡہُمۡ ثُمَّ تَابَ عَلَیۡہِمۡ ؕ اِنَّہٗ بِہِمۡ رَءُوۡفٌ رَّحِیۡمٌ۔ سورہ توبہ آیت نمبر: 117. اللہ تعالٰی نے پیغمبر کے حال پر توجہ فرمائی اور مہاجرین اور انصار کے حال پر بھی جنہوں نے ایسی تنگی کے وقت پیغمبر کا ساتھ دیا اس کے بعد کہ ان میں سے ایک گروہ کے دلوں میں کچھ تزلزل ہو چلا تھا پھر اللہ نے ان کے حال پر توجہ فرمائی ۔ بلاشبہ اللہ تعالٰی ان سب پر بہت ہی شفیق مہربان ہے۔ وضاحت: اس آیت سے معلوم ہوا کہ تبوک میں شرکت کرنے والے تمام افراد کو اللہ نے معاف کردیا۔ نیز وہ لوگ جنہوں نے پیچھے رہنے کی اجازت طلب نہ کی ان لوگوں کے بارے میں اللہ تعالیٰ نے فرمایا: لَا یَسۡتَاۡذِنُکَ الَّذِیۡنَ یُؤۡمِنُوۡنَ بِاللّٰہِ وَ الۡیَوۡمِ الۡاٰخِرِ اَنۡ یُّجَاہِدُوۡا بِاَمۡوَالِہِمۡ وَ اَنۡفُسِہِمۡ ؕ وَ اللّٰہُ عَلِیۡمٌۢ بِالۡمُتَّقِیۡنَ ﴿۴۴﴾التوبہ۔ اللہ پر اور قیامت کے دن پر ایمان و یقین رکھنے والے مالی اور جانی جہاد سے رک رہنے کی کبھی بھی تجھ سے اجازت طلب نہیں کریں گے ، اور اللہ تعالٰی پرہیزگاروں کو خوب جانتا ہے ۔ اس جنگ کے حوالے سے بڑا سخت حکم تھا کسی کو پیچھے رہنے کی اجازت نہیں تھی علاوہ چند افراد جو معذور تھے معاویہ رضی اللہ عنہ کا اس غزوہ سے پیچھے رہنا اور گھر بیٹھنے کی اجازت لینا ثابت نہیں ہے،لہذا وہ مذکورہ فضیلتوں کے مستحق بنتے ہیں۔

فتح مکہ سے قبل اور بعد میں ایمان لانے والے تمام صحابہ کے لیے (حسنی) جنت کا وعدہ ہے۔ وَ مَا لَکُمۡ اَلَّا تُنۡفِقُوۡا فِیۡ سَبِیۡلِ اللّٰہِ وَ لِلّٰہِ مِیۡرَاثُ السَّمٰوٰتِ وَ الۡاَرۡضِ ؕ لَا یَسۡتَوِیۡ مِنۡکُمۡ مَّنۡ اَنۡفَقَ مِنۡ قَبۡلِ الۡفَتۡحِ وَ قٰتَلَ ؕ اُولٰٓئِکَ اَعۡظَمُ دَرَجَۃً مِّنَ الَّذِیۡنَ اَنۡفَقُوۡا مِنۡۢ بَعۡدُ وَ قٰتَلُوۡا ؕ وَ کُلًّا وَّعَدَ اللّٰہُ الۡحُسۡنٰی ؕ وَ اللّٰہُ بِمَا تَعۡمَلُوۡنَ خَبِیۡرٌ ﴿10الحدید) تمہیں کیا ہو گیا ہے جو تم اللہ کی راہ میں خرچ نہیں کرتے؟ دراصل آسمانوں اور زمینوں کی میراث کا مالک ( تنہا ) اللہ ہی ہے تم میں سے جن لوگوں نے فتح سے پہلے فی سبیل اللہ دیا ہے اور قتال کیا ہے وہ ( دوسروں کے ) برابر نہیں بلکہ ان سے بہت بڑے درجے کے ہیں جنہوں نے فتح کے بعد خیراتیں دیں اور جہاد کیے ، ہاں بھلائی ( جنت) کا وعدہ تو اللہ تعالٰی کا ان سب سے ہے جو کچھ تم کر رہے ہو اس سے اللہ خبردار ہے ۔ وضاحت: اس آیت سے پتہ چلا کہ فتح مکہ سے پہلے مسلمان ہونے والے صحابہ کو بعد والے صحابہ فضیلت میں نہیں پہنچ سکتے۔لیکن تمام کے لئے اللہ تعالی نے (حسنی )یعنی جنت کا وعدہ کیا ہے۔ امام ابن حزم رحمه الله اپنی کتاب المحلى ( ج 1 ص83) پر فرماتے ہیں : یہ آیت نص ہے کہ جو نبی علیہ السلام کا ساتھی بن گیا اللہ تعالی نے اس کے لئے یقینی طور پر (حسنی) کا وعدہ کیا ہے اور اللہ تعالی کا ارشاد ہے کہ بےشک اللہ تعالیٰ وعدے کی خلاف ورزی نہیں کرتا. اور صحیح طور پر یہ نص بھی ثابت ہے جس کے لیے لیے (حسنی) کا فیصلہ سبقت لے گیا بے شک وہ آگ سے دور رہے گا وہ اسکی آہٹ بھی نہیں سنیں گے۔ اور وہ اس زندگی میں ہوگا جہاں پر جو چاہے گا اسے ملے گا ہمیشہ والی زندگی گزارے گا اسے قیامت کے دن کی بڑی گھبراہٹ پریشان نہیں کرے گی۔ یعنی جس کے لیے (حسنی ) کا فیصلہ ہو چکا ہے وہ جنتی انسان ہے ابن حزم سورہ انبیاء کی ان آیات سے دلیل لیتے ہیں۔ اِنَّ الَّذِیۡنَ سَبَقَتۡ لَہُمۡ مِّنَّا الۡحُسۡنٰۤی ۙ اُولٰٓئِکَ عَنۡہَا مُبۡعَدُوۡنَ ﴿۱۰۱﴾ۙ البتہ بیشک جن کے لئے ہماری طرف سے(حسنی) نیکی پہلے ہی ٹھہر چکی ہے وہ سب جہنم سے دور ہی رکھے جائیں گے ۔ لَا یَسۡمَعُوۡنَ حَسِیۡسَہَا ۚ وَ ہُمۡ فِیۡ مَا اشۡتَہَتۡ اَنۡفُسُہُمۡ خٰلِدُوۡنَ ﴿۱۰۲﴾ۚ وہ تو دوزخ کی آہٹ تک نہ سنیں گے اور اپنی من بھاتی چیزوں میں ہمیشہ رہنے والے ہونگے ۔ لَا یَحۡزُنُہُمُ الۡفَزَعُ الۡاَکۡبَرُ وَ تَتَلَقّٰہُمُ الۡمَلٰٓئِکَۃُ ؕ ہٰذَا یَوۡمُکُمُ الَّذِیۡ کُنۡتُمۡ تُوۡعَدُوۡنَ ﴿۱۰۳﴾ وہ بڑی گھبراہٹ ( بھی ) انہیں غمگین نہ کر سکے گی اور فرشتے انہیں ہاتھوں ہاتھ لیں گے ، کہ یہی تمہارا وہ دن ہے جس کا تم وعدہ دیئے جاتے رہے۔ ( الانبیاء 101/102/103) ان آیات سے معلوم ہوا جس کے لیے(حسنی) کا فیصلہ ہو چکا ہے وہ جھنم سے آزاد اور جنتی انسان ہے اور بفضل اللہ ، معاویہ رضی اللہ عنہ اس لسٹ میں داخل ہیں، مرزا اور اسکے حواری ان کو اپنی خباثت کی وجہ سے اس لسٹ سے خارج نہیں کر سکتے۔ شیخ الاسلام ابن تیمیہ رحمۃ اللہ علیہ فرماتے ہیں: (مجموع الفتاوى: [4/459]۔ بےشک یہ وہ طلقاء تھے جو فتح مکہ کے موقعہ پر مسلمان ہوئے تھے اور( معاویہ رضی اللہ عنہ ) ان میں سے تھے جنہوں نے فتح مکہ کے بعد مال خرچ کیا اور جہاد کیا یقینا اللہ نے ان کے لئے حسنی (جنت )کا وعدہ کیا ہے انہوں نے حنین اور طائف میں اپنا مال خرچ کیا اور ان جنگوں میں شرکت کی۔ (مجموع الفتاوى: [4/459]۔

وَ السّٰبِقُوۡنَ الۡاَوَّلُوۡنَ مِنَ الۡمُہٰجِرِیۡنَ وَ الۡاَنۡصَارِ وَ الَّذِیۡنَ اتَّبَعُوۡہُمۡ بِاِحۡسَانٍ ۙ رَّضِیَ اللّٰہُ عَنۡہُمۡ وَ رَضُوۡا عَنۡہُ وَ اَعَدَّ لَہُمۡ جَنّٰتٍ تَجۡرِیۡ تَحۡتَہَا الۡاَنۡہٰرُ خٰلِدِیۡنَ فِیۡہَاۤ اَبَدًا ؕ ذٰلِکَ الۡفَوۡزُ الۡعَظِیۡمُ ﴿۱۰۰/ التوبہ) اور جو مہاجرین اور انصار سابق اور مقدم ہیں اور جتنے لوگ اخلاص کے ساتھ ان کے پیروکار ہیں اللہ ان سب سے راضی ہوا اور وہ سب اس سے راضی ہوئے اور اللہ نے ان کے لئے ایسے باغ مہیا کر رکھے ہیں جن کے نیچے نہریں جاری ہوں گی جن میں ہمیشہ رہیں گے یہ بڑی کامیابی ہے ۔ وضاحت: اس آیت میں پہلا افضل ترین گروہ سابقین کو قرار دیا گیا ہے پھر بعد میں ایمان لانے والے افراد کا طبقہ ہے اور معاویہ رضی اللہ عنہ اس دوسرے طبقہ میں داخل ہیں ۔ لیکن رب العالمین نے سب کے لیے جنت کا وعدہ فرمایا ہے۔

مُحَمَّدٌ رَّسُوۡلُ اللّٰہِ ؕ وَ الَّذِیۡنَ مَعَہٗۤ اَشِدَّآءُ عَلَی الۡکُفَّارِ رُحَمَآءُ بَیۡنَہُمۡ تَرٰىہُمۡ رُکَّعًا سُجَّدًا یَّبۡتَغُوۡنَ فَضۡلًا مِّنَ اللّٰہِ وَ رِضۡوَانًا ۫ سِیۡمَاہُمۡ فِیۡ وُجُوۡہِہِمۡ مِّنۡ اَثَرِ السُّجُوۡدِ ؕ ذٰلِکَ مَثَلُہُمۡ فِی التَّوۡرٰىۃِ ۚ ۖ ۛ وَ مَثَلُہُمۡ فِی الۡاِنۡجِیۡلِ ۚ ۟ ۛ کَزَرۡعٍ اَخۡرَجَ شَطۡئَہٗ فَاٰزَرَہٗ فَاسۡتَغۡلَظَ فَاسۡتَوٰی عَلٰی سُوۡقِہٖ یُعۡجِبُ الزُّرَّاعَ لِیَغِیۡظَ بِہِمُ الۡکُفَّارَ ؕ وَعَدَ اللّٰہُ الَّذِیۡنَ اٰمَنُوۡا وَ عَمِلُوا الصّٰلِحٰتِ مِنۡہُمۡ مَّغۡفِرَۃً وَّ اَجۡرًا عَظِیۡمًا ﴿29 الفتح) محمد ( صلی اللہ علیہ وسلم ) اللہ کے رسول ہیں اور جو لوگ ان کے ساتھ ہیں کافروں پر سخت ہیں آپس میں رحمدل ہیں تو انہیں دیکھے گا رکوع اور سجدے کر رہے ہیں کہ اللہ تعالٰی کے فضل اور رضامندی کی جستجو میں ہیں ، ان کا نشان ان کے چہروں پر سجدوں کے اثر سے ہے ، ان کی یہی مثال تورات میں ہے اور ان کی مثال انجیل میں ہے مثل اس کھیتی کے جس نے اپنا انکھوا نکالا پھر اسے مضبوط کیا اور وہ موٹا ہوگیا پھر اپنے تنے پر سیدھا کھڑا ہوگیا اور کسانوں کو خوش کرنے لگا تاکہ ان کی وجہ سے کافروں کو چڑائے، ان ایمان والوں اور نیک اعمال والوں سے اللہ نے بخشش کا اور بہت بڑے ثواب کا وعدہ کیا ہے ۔ وضاحت: اس آیت سے تمام صحابہ کی عبادت وغیرہ کو مثالی کہا گیا ہے اور ان دلوں کی سچائی بیان کی گئی ہے کہ ان کا مقصد حیات رب العالمین کی رضامندی کی تلاش ہےاور بفضل اللہ معاویہ رضی اللہ عنہ اس لسٹ میں داخل ہیں۔ امام قرطبي رحمه الله اس آیت کی تفسیر میں فرماتے ہیں: میں کہتا ہوں صحابہ سارے کے سارے عادل ہیں اللہ کے ولی ہیں اور اس کے چنے ہوئے ہیں اور اللہ کی مخلوق میں انبیاء اور رسولوں کے بعد سب سے اعلی انسان ہیں، یہ اہل سنت والجماعت کا مذھب ہے اور اسی مذہب پر اس امت کے ائمہ کی جماعت تھی اور ایک چھوٹا سا گروہ جن کی کوئی پرواہ نہیں ( انکا کوئی شمار نہیں) اس موقف کی طرف گیا ہے کہ صحابہ کا حال بھی بعد والے افراد کی طرح ہے لہذا ان کی عدالت کے بارے میں تحقیق کی جائے گی. ان کی ایسی باتوں کی کوئی حیثیت نہیں ہے ۔